ಕಾಸರಗೋಡುದ ತುಳು ಬಾಸೆದ ಪೊಲಬು

ಕೇರಳ ತುಳು ಅಕಾಡೆಮಿಯು 2019 ಡಿಸೆಂಬಂರ್ 17 ಮತ್ತು 18 ರಂದು ಕಾಸರಗೋಡು ಲಲಿತ ಕಲಾ ಸದನದಲ್ಲಿ ಆಯೋಜಿಸಿದ ಎರಡು ದಿನಗಳ ರಾಷ್ಟ್ರೀಯ ತುಳು ಸೆಮಿನಾರಿನಲ್ಲಿ ನಾನು ಮಂಡಿಸಿದ ಪ್ರಬಂಧ..... 

ಕಾಸರಗೋಡುದ ತುಳು ಬಾಸೆದ ಪೊಲಬು

– ನಾರಾಯಣ ದೇಲಂಪಾಡಿ

ಮುನ್ನುಡಿ

    ಸತ್ತಿಗೆದಾತ್ ಮಲ್ಲೆ

    ಅರಿವಾಣದಾತ್ ಉರುಂಟು

    ಪಣವುದಾತ್ ಪೊರ್ಲು

    ತಿರ್ತ್ ತುಳುವ ರಾಜ್ಯ

    ಬಾರಿ ಪೊರ್ಲು ತೋಜುಂಡು

ಉಂದು ನಮ ತುಳು ರಾಜ್ಯೊತ ಬಗ್ಗೆ ಪಂಜುರ್ಲಿ ಪಾಡ್ದನೊಡು ಪನ್ಪಿನ ಸಂಧಿ......

ಇಂಚಿನ ಪೊರ್ಲುದ ತುಳುನಾಡ್ದ ಮಸ್ತ್ ಪ್ರಧಾನವಾಯಿನ ನಮ ಕಾಸರಗೋಡುದ ತುಳು ಬಾಸೆದ ಪೊಲಬು ಪನ್ಪಿನ ಇಸಯೊಡು ಪಾತೆರುನ ಮಲ್ಲ ಒಂಜಿ ಜವಾಬ್ದಾರಿನ್ ಎಂಕ್ ವಹಿಸಾತೆರ್.

ಅಪಗಾಂಡ ಯಾನ್ ಒಲ್ತು ಸುರು ಮಲ್ಪೊಡು ಪಂದ್ ಎಂಕ್ ಗೊತ್ತಾಪುಜಿ, ದಾಯೆ ಪಂಡ ನಮ ಕಾಸರಗೋಡು ಬಾರಿ ಪೊರ್ಲುತ ತುಳುನಾಡ್‍ದ ಒಂಜಿ ಬಾಗೊ ಮಾತ್ರ.... ಅಂಚಾದುಪ್ಪುನಗ ಇಡೀ ತುಳುನಾಡ್‍ದ ಬಗ್ಗೆ ಪಾತೆರುನ ಅಧಿಕಾರ ಉಂಡೋ ಇಜ್ಜೋ ಪಂಡ್‍ದ್ ಎಂಕ್ ಸಂಶಯೊ ಆವೋಂದುಂಡು. ಅವು ಇಜ್ಜಿಂದಾಂಡ ಕಾಸರಗೋಡುಡು ಮಾತ್ರಾ ಬುಳೆತಿನ ಒಂಜಿ ಬಾಸೆ ಪಂಡ್‍ದ್ ಉಂಡಾ? ಅವು ಇಜ್ಜಿ.... ಅಂಚಾನಗ ಒಟ್ಟು ತುಳುನಾಡ್, ಒಟ್ಟು ತುಳು ಬಾಸೆದ ಪೊಲಬು, ಅಯ್ಟ್ ನಮ ಕಾಸರಗೋಡುದ ಮಾತ್ರಾ ಆದುಪ್ಪುನ ಪ್ರತ್ಯೇಕತೆ... ಈ ಇಸಯೊಗುಲೆನ ಬಗ್ಗೆ ನಿಕುಲೆಟ ಎನ್ನ ಅಭಿಪ್ರಾಯೊಲೆನ್ ಯಾನ್ ಪಟ್ಟೊನುವೆ...

ಒವ್ವು ತುಳುನಾಡ್

ತುಳುನಾಡ್‍ದ ಗಡಿತ ಬಗ್ಗೆ ಬೇತೆ ಬೇತೆ ರೀತಿದ ವಿಚಾರೊಗುಲು ನಮಕ್ಕ್ ತೆರಿದ್ ಬರ್ಪುಂಡು. ಮೂಡಾಯಿ ಪಡ್ಡೆಯಿ ಗಡಿತ ಬಗ್ಗೆ ವಾ ವಿವಾದೊಲಾ ಇಜ್ಜಿ ಆಂಡ ತೆನ್ಕಾಯಿ ಬಡೆಕ್ಕಾಯಿ ಗಡಿತ ಬಗ್ಗೆ ಮಸ್ತ್ ಅಭಿಪ್ರಾಯೊಲು ಉಂಡು. ಅವ್ವೆಟ್ ಕೆಲವೆನ್ ಪನ್ಪುಂಡೂಂದಾಂಟ.....

    ಬಡೆಕ್ಕಾಯಿ ಗಂಗೆಂಡ್ತ್ ತೆನ್ಕಾಯಿ ಮಲ್ಯಾಲ ಮುಟ್ಟ, ಮೂಲು ಗಂಗೆ ಪಂಡ ಗಂಗೊಳ್ಳಿ.

    ತುಳುನಾಡ್‍ದ ಗಡಿ ಮೂಡಾಯಿ ಸಹ್ಯಾದ್ರಿ, ಬಡೆಕ್ಕಾಯಿ ಅರೆಬೀ ಸಮುದ್ರೊ, ತೆನ್ಕಾಯಿ 
    ಚಂದ್ರಗಿರಿ ಸುದೆ, ಬಡೆಕ್ಕಾಯಿ ಸೀತಾನದಿ.....

ಮೂಲು ಬಾರ್ಕೂರು ಸೀತಾನದಿತ ಬರಿಟುಪ್ಪುನ ಒಂಜಿ ಊರಾಯಿನೇಡ್‍ತಾತ್ರ ತುಳು ನಾಡ್ ಪಂಡ ಚಂದ್ರಗಿರಿಡ್ತ್ ಬಾರ್ಕೂರು ಮುಟ್ಟಂದ್ ಪನೊಲಿ. ಕೆಲವು ಮಲಯಾಳೊ ಪುಸ್ತಕೊಲೆಟ್ ತುಳುನಾಡ್‍ದ ತೆನ್ಕಾಯಿ ಗಡಿನ್ ಕಾಂಞಂಗಾಡ್‍ದ ಮುಟ್ಟ ಉಪ್ಪುನ ಚಿತ್ತಾರಿ ತುದೆ ಮುಟ್ಟ ಕೊಂಡೋಪೆರ್.

ಅಂಚನೇ ತೋಡಕುಕ್ಕಿನಾರ್ ದೈವೊದ ದಿಗ್ವಿಜಯ ನುಡಿಟ್ಟ್....

    ರಾಮೇಶ್ವರ ಗಡಿಡ್ತ್ ನೀಲೇಶ್ವರ ಗಡಿಕ್ಕ್

    ನೀಲೇಶ್ವರ ಗಡಿಡ್ತ್ ತುಳುನಾಡ್ದ ಗಡಿಕ್ಕ್

    ತುಳುನಾಡ್ ರಾಜ್ಯೊ ೫೨ ಗಾವುದ

    ಮೂಡಾಯಿ ಕುಡುಮ ಪಡ್ಡಾಯಿ ಪೈಯ್ಯೊಳಿಗೆ

    ನಡು ಕಣಂದೂರುಳಿಯಾಂದ್ ಪನ್ಪವೋಂಡ ತುಳು ರಾಜ್ಯೊಂದು ಪನ್ತೆರ್.

೧೪೩೦ ಟ್ ಬರೆಯಿನ ಮೂಡಬಿದಿರೆದ ಜೈನಶಾಸನೊಡು ತುಳುನಾಡ್‍ನ್ ಆಖಿಲ ಭಾರತ ಮಟ್ಟೊಡು ಗುರುತಿಸಾದೆರ್

    ಆ ಸುರಗಿರಿಯಂ ತೆಂಕಲ್

    ಭಾಸುರಮೆಸೆಗುಂ ಧರಿತ್ರಿ ಭರತಾಖ್ಯತೆಯಿಂ

    ಕಾಸಾರಾದಿಗಳಿಂ ತುಳು

    ದೇಶಂ ಕಡುರಯ್ಯಮಾದುದಾ ಭಾರತದೊಳ್

ಈ ಮಾತಾ ಸಂಧಿ, ಪಾತೆರೊ, ಶಾಸನೊಲೇನ್ ತೂಂಡಲಾ ಅಯ್ಟಿ ಪೂರೇಟ್ಲಾ ನಮ ಕಾಸರಗೋಡು ಉಂಡು ಪನ್ಪಿನವು ನಮ್ಮ ತುಳು ನಾಡ್‍ದ ಪೊಲಬು. ಅಂಚಾದ್ ಇತ್ತೆದ ಉಡುಪಿ, ದಕ್ಷಿಣ ಕನ್ನಡೊ ಬುಕ್ಕ ನಮ್ಮ ಕಾಸ್ರೋಡು ಸೇರ್ದಿನ ಭೂಭಾಗೊನು ಪರಂಪರಾಗತವಾದ್ ತುಳುನಾಡ್ಂದ್ ಪನ್ಪೆರ್.

ದ್ರಾವಿಡ ಬಾಸೆಲೇಟ್ ತುಳುತ್ತ ಸ್ಥಾನೊ

    ಏತ್ ಪೊರ್ಲುದ ಬಾಸೆ ನಮ ತುಳು

    ಸಾರ ಎಸಳ್‍ದ ತಾಮರೆ

    ಪಂಡಿ ಬಾಯಿಟ್ ಕೇಂಡಿ ಕೆಬಿಟ್

    ಉರ್‍ಕರುಂಡಮೃತೊದ ನುರೆನುರೆ

ಪಂಡ್‍ದ್ ನಮ ಕವಿ ಕಯ್ಯಾರೆರ್ ಪನ್ತೆರ್.

೧೮೫೬ಟ್ ರಾಬರ್ಟ್ ಕಾಲ್ಡ್ ‍ವೆಲ್ ಮಾತಾ ದ್ರಾವಿಡ ಬಾಸೆಗುಲೆನ ಅಧ್ಯಯನ ಮಲ್ತ್‍ದ್ ದ್ರಾವಿಡಿಯನ್ ಕಂಪೆರಿಟಿವ್ ಗ್ರಾಮರ್ ಪನ್ಪಿನ ಪುಸ್ತಕೊನು ಬರೆಯೆರ್. ಅಯಿಟ್ ಆರ್ ದ್ರಾವಿಡ ಭಾಷಾ ಕುಟುಮೊಟು ತುಳು ಮಸ್ತ್ ಬುಳರ್ಚೆ ಪಡೆಯಿನ ಭಾಷೇಂದ್ ಪಂಡೆರ್. ಆಂಚಾದ್ ಭಾಷಾ ವಿಜ್ಞಾನಿಲು ತುಳು ಬಾಸೆತ ಅಧ್ಯಯನ ಮಲ್ಪಿಯೆರ ಸುರು ಮಲ್ತೆರ್. ತುಳು ಬಾಸೆತ ವೈಶಿಷ್ಟ್ಯೊ ಬುಕ್ಕ ಮೌಖಿಕ ಸಾಹಿತ್ಯ ಸಂಪತ್ತುಲೆನ್ ಗಮನಿಸಾದ್ ತಮಿಳ್, ಕನ್ನಡ, ತೆಲುಗು ಬೊಕ್ಕ ಮಲಯಾಲ ಬಾಸೆಗ್ ಸಮಾನವಾಯಿನ ಬೆಲೆ ಕೊರುತು ಪಂಚದ್ರಾವಿಡ ಬಾಸೆಟ್ ಒಂಜಿ ಪಂಡ್ದ್ ಗುರುತಿಸಾಯೆರ್.

    

೧೯೮೩ಟ್ ಬುಡುಗಡೆ ಆಯಿನ ಕು. ಶಿ. ಹರಿದಾಸ ಭಟ್ಟೆರನ 'ತುಳುತ ಬುಳೆ, ನಿಲೆ ಬಿಲೆ' ಪನ್ಪಿ ಪುಸ್ತಕೊಡು ಆರ್ ಪನ್ಪೆರ್....

ಲೆಕ್ಸಿಕೋಸ್ಟೇಟಿಸ್ಟಿಕ್ಸ್ ಶಾಸ್ತ್ರದ ಪ್ರಕಾರ ಯೋಚನೆ ಮಲ್ಪುನಗ ತುಳು ಸಾಧಾರಣೋ ಕ್ರಿಸ್ತ ಪೂರ್ವೊ ೬ನೇ ಶತಮಾನೊಡು ಸ್ವತಂತ್ರ ಬಾಸೆ ಆಂಡ್ಂದ್ ತೆರಿದ್ ಬರ್ಪುಂಡು. ದ್ರಾವಿಡ ಬಾಸೆ ಪಾತೆರುನ ಜನೊಕ್ಲು ಮಧ್ಯ ದ್ರಾವಿಡೊ, ದಕ್ಷಿಣ ದ್ರಾವಿಡೊ ಆತ್ ಎಗೆ ಆಪುನೇಡ್ತ್ ದುಂಬೇ ತುಳು ಪಾತೆರುನ ಜನೊಕ್ಲು ಪಡ್ಡೆಯಿ ಕರಾವಳಿಗ್ ಬತ್ತೆರ್. ಅಪಗಾಂಡ ನಮ್ಮ ಕಾಸರಗೋಡುದ ತುಳುಕ್ಕು, ತುಳುವೆರೆಗ್ ಕಮ್ಮಿ ಪಂಡಲಾ ಸಾಧಾರಣ ೨೫೦೦ ವರ್ಷದ ಪಿರಾಕ್ ಉಂಡು ಪನ್ಪಿನವು ನಮಕ್ಕ್ ಅಭಿಮಾನದ ಇಸಯೊ.

 

ತುಳು ಲಿಪಿ

ನನ ತುಳು ಲಿಪಿತ್ತ ಇಸಯೊ ಪನ್ಪುನೂಂದಾಟ ನಮಕ್ಕ್ ಮಸ್ತ್ ಸುಧಾರಣೆ ಆತಿತ್ತಿನ ಒಂಜಿ ಲಿಪಿ ಇತ್ತಂಡ್. ಅಯಿಟ್ಟೇ ನಮ ಪಿರಾಕ್‍ದಕುಲು ಕಾವ್ಯ ರಚನೆ ಮಲ್ತೆರ್ ಪನ್ಪುನ ಉದಾಹರಣೆಲಾ ಬುಕ್ಕ ನಮಕ್ಕ ತಿಕ್ಕ್ಂಡ್. ನಮ ತುಳುನಾಡ್‍ದಕುಲು ಪೂಜೆ ಪುನಸ್ಕಾರೊಗಾತ್ರ ಕೇರಳೊಗು ಪೋಯಿ ಕಾಲೊಡು ನಮ ಲಿಪಿಲಾ ಅಕುಲೆನೊಟ್ಟುಗೆ ಕೇರಳೊಗು ಪೋತು ತುಳು ಮಲಯಾಳ ಲಿಪಿಂದ್ ತೆರಯೊನ್ಂಡ್. ಬುಕ್ಕ ಅಯಿಡ್ತೇ ಮಲಯಾಳ ಲಿಪಿಲಾ ಬುಳೆಯಿಂಡ್ಂದ್ ತೆರಿನಕುಲು ಪನ್ಪೇರ್. ನೆಕ್ಕ್ ಸಾಕ್ಷಿ ಪಂಡ ಇನಿಲಾ ಉಡುಪಿದ ಅಷ್ಟ ಮಠೊತ್ತ ಯತಿಕ್ಲು ಉಂದುವೇ ಲಿಪಿನ್ ಉಪಯೊಗೊ ಮಲ್ಪುವೆರ್ ಬುಕ್ಕ ಅಯ್ತನೇ ಒಂಜಿ ರೂಪೊ ಆಯಿನ ತಿಗಳಾರಿ ಲಿಪಿ ಉತ್ತರ ಕನ್ನಡೊ ಭಾಗೊಡು ಇನಿಲಾ ಉಪಯೋಗೊಡುಂಡು.

ತುಳುನಾಡ್ ಕಾಸರಗೋಡುದ ಪರಪೋಕು

ಗಡಿನಾಡಾಯಿನ ಕಾಸರಗೋಡುತ ಇತಿಹಾಸೊ, ಪರಪೋಕುದ ಬಗ್ಗೆ ಮಸ್ತ್ ವಿಚಾರೊಲೆನ್ ತೆರಿಪಾವುನ ಪುಸ್ತಕೊಗ್ಲೆನ ಪೈಕಿಡ್ ಉದಯವರ್ಮ ರಾಜೆರೆನ ತುಳುನಾಡ್‍ದ ಗತವೈಭವೊ, ಉಪ್ಪಂಗಳ ರಾಮ ಭಟ್ಟೆರೆನ ಗಡಿನಾಡ್ ಕಾಸರಗೋಡು ಬೊಕ್ಕ ಶಿವಾನಂದ ಬೇಕಲ್ ಬರೆತಿನ ಬೇಕಲ ಕೋಟೆ ಒಂಜಿ ಚಾರಿತ್ರಿಕ ಅಧ್ಯಯನೊ ಕೃತಿಕ್ಲು ಪ್ರಧಾನವಾದುಂಡು.

ತುಳುತ್ತ ಪರಪೋಕು ಬಾರೀ ಪ್ರಧಾನವಾಯಿನವು. ತೆನ್ಕಾಯಿ ಭಾರತೊದ ಸಂಸ್ಕೃತಿದ ಅಧ್ಯಯನೊಡು ತುಳು ಬಾಸೆ, ಸಾಹಿತ್ಯೊದ ಪಾಲ್ ಮಸ್ತ್ ಉಂಡು. ಸುಮಾರ್ ಐವ ವರ್ಷೊಡ್ತು ದುಂಬು ಕಾಸರಗೋಡುಟು ತುಳು ಲಿಪಿ ಗೊತ್ತಿತ್ತಿನ ಮಸ್ತ್ ವಿದ್ವಾಂಸೆರ್ ಇತ್ತೆರ್ಂದ್ ಪುಣಿಂಚಿತ್ತಾಯೆರ್ ಪನ್ಪೆರ್. ಆಂಡ ಕಾಲೊ ಪೋಯಿ ಲೆಕ್ಕನೇ ತುಳು ಲಿಪಿದ ಒಸರ್ ಆಜಿಂಡ್. ತುಳುನಾಡ್‍ದ ಚರಿತ್ರೆದ ಸುರತ ಕಾಲೊಡು ಮೂಲ ದ್ರಾವಿಡ ಸಂಸ್ಕೃತಿಗ್ ಸೇರ್‍ದಿನ ಕೊರಗ, ಪರವ, ಪಂಬದ, ನಲಿಕೆ, ಮಲೆಕುಡಿಯ ಜನಾಂಗೊದಕುಲು ಮೂಲು ಜೀವನೊ ಮಲ್ತೊಂದಿತ್ತೆರ್. ತುಳು ಅಕ್ಲೆನ ಬಾಸೆ ಆದಿತ್ತ್ಂಡ್.

ತಮಿಳ್ ಸಂಗೊ ಕಾಲೊದ ಸಾಹಿತ್ಯೊ ಅಗನಾನೂರ್ ಪ್ರಕಾರೊ ತುಳುನಾಡ್‍ನ್ ಕೊಶರೆರ್ ಪನ್ಪಿನ ಜನೊಕ್ಲು ಆಳ್ವಿಕೆ ಮಲ್ತೋಂದಿತ್ತೆರ್‍ ಪನ್ದ್ ಪನ್ತೆರ್.

'ಮೆಯ್ಮಲಿ ಪೆರುಂಪೂಣ್ ಚೆಮ್ಮ ಕೋಶರ್ ತುಳುನಾಡು'

ಈ ಕೊಶರ್ ಪನ್ಪಿನಕುಲೇ ಕೊರಗೆರ್ ಪನ್ಪಿನ ಒಂಜಿ ವಾದಲಾ ಉಂಡು ಆಂಡ ಅಯಿಕ್ಕ್ ಬೋಡಾಯಿನಾತ್ ಸಾಕ್ಷಿ ತಿಕ್ಕಿತಿಜಿ

ಸಿದ್ದಾಪುರೊಟು ತಿಕ್ಕಿನ ಕ್ರಿಸ್ತ ಪೂರ್ವೊ ೨೬೩ನೇ ಕಾಲೊತ ಅಶೋಕನ ಶಾಸನೊಟು ತುಳು ರಾಜ್ಯೊನು ಸತಿಯಪುತ್ರೆರ್ ಆಳೋಂದಿತ್ತೆರ್ ಪನ್ಪಿನ ವಿಚಾರೊ ಉಂಡು

೧೨ನೇ ಶತಮಾನೊದ ಸುರುತ ಕಾಲೊತ ಹೊಯ್ಸಳೆರೆನ ರಾಜೆ ವಿಷ್ಣುವರ್ಧನೆರೆನ ಕಾಲೊತ ಒಂಜಿ ಪದ್ಯೊಟು ತುಳುವರು ಪನ್ಪಿನ ಪದೊ ಉಂಡು

೧೪೩೦ ಟ್ ಬರೆದಿನ ಮೂಡಬಿದಿರೆದ ಜೈನಶಾಸನೊಡು

ಆರ ಮನಕ್ಕೆ ಮಾಡದೊಲವಂ ತುಳುದೇಶಮನೇಕಧೇಶದೊಳ್

ಪಂಡ್‍ದ್ ನಮ್ಮ ತುಳುನಾಡ್‍ನ್ ಪುಗರ್ದೆರ್

ಅವ್ವೇ ಲೆಕ್ಕನೇ ಕಾಸರಗೋಡುಡು ತುಳು ಬಾಸೆದ ಪುದರ್ ಬರ್ಪಿನ ಜಾಗೆಗುಲು ಮಸ್ತ್ ಉಂಡು, ಪಂಜಿಕಲ್ಲ್, ಬದಿಯಡ್ಕ, ಮುಗೇರ್.....

ತುಳು ಜನಪದ ಸಾಹಿತ್ಯೊ

ಸಾದಾರನೊ ೨೦೦೦ ವರ್ಸೊತ ಪಿರಾಕ್ ಉಂಡುಂದು ಪನ್ಪಿನ ತುಳು ಬಾಸೆಟ್ ಮೌಖಿಕವಾಯಿನ ಜನಪದ ಸಾಹಿತ್ಯೊ ಮಸ್ತ್ ಉಂಡು. ಪಾಡ್ದನ, ಸಂಧಿ, ಕಬಿತೆ, ಉರಾಳ್, ನುಡಿಕಟ್ಟ್, ಮದಿಪು, ಅಜ್ಜಿ ಕತೆ, ಗಾದೆ, ಎದುರ್ಕತೆ, ಪುರಾಣೊ ಪನ್ಪಿನ ಬೇತೆ ಬೇತೆ ರೀತಿದ ಮೌಖಿಕ ಸಾಹಿತ್ಯೊಡು ತುಳು ಶ್ರೀಮಂತವಾದುಂಡು.

ತುಳು ಜನಪದ ಸಾಹಿತ್ಯೊ ಪಂಡ ಅವು ಶೃಂಗಾರದ ಚೀಪೆ, ಹಾಸ್ಯದ ಉಪ್ಪಡ್, ಸಮಾಜ ವಿಮರ್ಶೆದ ಖಾರ ಮಾತ ಸೇರ್‍ದ್, ಗಾದೆ ಒಗಟುಲೆನ ಒಗ್ಗರಣೆ ಕೂಟುದು ನೇಲ್ಯ ರಸಮಯ ಒಣಸ್ ಆತ್ ನಂಕ್ ತಿಕ್ಕ್ ತ್ಂಡ್. ಪಾಡ್ದನ, ಬೀರ ಸಂಧಿ, ಓ ಬೇಲೆ ಕೆಲಸೊದ ಪದೊಕುಳು, ಉರಾಲ್ ಎರು ಕಟ್ಟುನಗ ಪನ್ಪಿ ಪದೊಕುಲು, ಮದಿಪು ದೈವೊತ ನುಡಿ, ಸೋಬಾನೆ ಪೊಂಜೊವುಳು ಪನ್ಪಿ ಪದ್ಯೊಗುಳು ಪೂರಾ ನಮ ತುಳುನಾಡ್‍ದ ಪರಪೋಕುದ ಅಕ್ಷಯವಾಯಿನ ಕಣಜೊ, ಅಯಿಟ್ಟ್ ನಮ ಕಾಸರಗೋಡುದ ಪಾಲ್‍ಲಾ ಎಲ್ಯವು ಅತ್ತ್.  
ಪಾಡ್ದನೊ ಪಂಡ್ದ್ ಪಂಡ್ದ್ ಬಾಯಿಟೊರಿಂಡ್,  
ನಾರಂಗಾಯಿ ಕೊಯಿ ಕೊಯಿ ಬಿತ್ತಿಲ್‍ಟೊರಿಂಡ್ಂದ್ 
ಪಂಡಿಲೆಕ್ಕನೇ ಉಂದು ಏತ್ ಪಂಡಲಾ ಏತ್ ದೆತ್ತ್ಂಡಲಾ ಮುಗಿವುನ ಸೊತ್ತು ಅತ್ತ್. 

     ಕಾಸರಗೋಡುದ ತುಳು ಬೊಕ್ಕ ಬಾಕಿ ಪ್ರದೇಶೋತ ತುಳುತ್ತೆಡೆಡುಪ್ಪುನ ಪ್ರಧಾನವಾಯಿನ ವ್ಯತ್ಯಾಸೊಲು......

ನಮ ಕಾಸರಗೊಡುದ ಮೂಡಾಯಿ ತೆನ್ಕಾಯಿ (ಆಗ್ನೇಯ, ದಕ್ಷಿಣ) ಬಾಗೊಡು ಕೆಲವು ಬುಡಕಟ್ಟ್ ವಿಭಾಗೊದಕುಲು ಪಾತೆರುನ ತುಳುಟ್ಟು ಮಸ್ತ್ ಮಲಯಾಳೊ ಪದೊಕುಲು ಸೇರ್‍ದ್ ಸಾಮಾನ್ಯ ತುಳುವೆರೆಗ್ ಅರ್ಥೊ ಮಲ್ತೊನಿಯೆರೆ ಸಾದ್ಯೊ ಇಜ್ಜಾಂತಿನಾಡೆಗ್ ಎತ್ತ್ಂಡ್. ಉದಾಹರಣೆಗ್ ಬಂದಡ್ಕೊ, ಕುಂಡಂಗುಯಿ, ರಾಜಪುರೊ, ಮಡಿಕೈ ಭಾಗೊಡುಪ್ಪುನಕ್ಲೆನ ತುಳು ಬಾಸೆ. ಆಂಡ ಆ ಬಾಗೊಟು ಇನಿ ತುಳುನು ಒರಿಪಾಯಿನಕುಲು ಆ ಸಾಮಾನ್ಯ ಬುಡಕಟ್ಟ್ ಜನಾಂಗೊತಕುಲು ಮಾತ್ರಾ ಪನ್ಪಿನವು ನಮಕ್ಕ್ ಅಭಿಮಾನದ ಇಸಯೊ.   

ಅವ್ವೇ ಲೆಕ್ಕನೆ ಮಲಯಾಳಿ ಮಾವಿಲನ್ ವಿಭಾಗೊತಕುಲು ಅಕುಲೆನ ಮದಿಮೆದ ಸಮಯೊಡು ಗೊಬ್ಬುನ ಮಂಗಲಂಕಳಿ ಪನ್ಪಿನ ಕಲಾ ರೂಪೊಡು ಉಪ್ಪುನ ಹೆಚ್ಚಿಗೆ ಪದೊಕುಲುಲಾ ನಮ ತುಳುತ್ತವು ಪನ್ಪಿನವು ನಮ್ಮ ತುಳು ಓಡೆ ಮುಟ್ಟ ಇತ್ತ್ಂಡ್ ಪನ್ಪಿನೆಕ್ ಸಾಕ್ಷಿ. ಎಲ್ಲುಲ್ಲೇರಿ ಎಲ್ಲುಲ್ಲೇರಿ ಮಾನಿನಂಗರೇ, ವಿರಾಜ್ ಪೇಟೆ ದುಂಡುಗಯಾ ಮಾನಿನಂಗರೇ... ಮಾನಿನಂಗರೆ ತಂಗಾಟಿ ಮದಿಮ್ಮಾಳುತ್ತುಂಡೇ..   

ಆಂಡ ಕಾಲ ಪೋಯಿಲೆಕ್ಕನ ನಮ ಕಾಸರಗೋಡುತಕುಲು ತುಳುಡ್ದು ದೂರಾವೋಂದುಲ್ಲ ಪನ್ಪಿನ ಬೇಜಾರ್ ನಮಕ್ಕ್ ಉಂಡು... ಅಯಿನಿ ಕವಿ ಕಯ್ಯಾರೆರ್ ಇಂಚ ಪನ್ಪೆರ್..

ಅಂಚಿ ತಮಿಳೆರ್, ಇಂಚಿ ತೆಲುಗೆರ್, ಎಂಚ ಕನಡೆರ್ ಮೆರೆಪೆರೊ

ಕಣ್ಣೆದುರೆ ಕೇರಳೊಲ ಕೆಲೆಪುಂಡು, ಎನ್ನ ತುಳುನಾಡ್ ಬುಲಿಪುಂಡು

ಮುಗಿತಲೆ....

೧೮೯೧ನೇ ಲೆಕ್ಕ ಪ್ರಕಾರೊ ಕಾಸರಗೋಡುಟು ೮೩೪೭೫ ತುಳುವೆರಿತ್ತೆರ್ಂದ್ ಎಚ್. ಎ. ಸ್ಟುವರ್ಟ್ ಪನ್ಪೆರ್. ಆಂಡ ಕಾಲೊ ಪೊಯಿ ಲೆಕ್ಕನೇ ಅಯಿತ ಬುಳರ್ಚೆತ ಪ್ರಮಾಣೊ ಕಡಿಮೆ ಆವೊಂದುಂಡು. ಬಾಕಿ ಬಾಸೆ ಬುಳೆಯಿನೇಕ್ ಸರಿಯಾದ್ ನಮ್ಮ ತುಳು ಬಾಸೆ ಬುಳೆತಿಜಿ.

ಒಂಜಿ ಬುಳೆ ಹಾಳಾಂಡ ಒಂಜಿ ವರ್ಷ ಹಾಲಾಯಿಲೆಕ್ಕ, ಒಂಜಿ ಬಾಸೆ ಹಾಳಾಂಡ ಒಂಜಿ ಸಂಸ್ಕೃತಿ ಹಾಳಾಯಿಲೆಕ್ಕ ಪನ್ಪಿನ ಪಾತೆರದ ಲೆಕ್ಕನೇ ನಮ ಸಂಸ್ಕೃತಿನ್ ಒರಿಪಾಯೆರೆಗಾದ್ ನಮ ಬಾಸೆನ್ ನಮನೇ ಒರಿಪಾವೊಡು.   

'ವಾಳ್‍ಕ ವಾಳ್‍ಕ ಎಂಡೆ ವಡಕ್ಕು ರಾಜ್ಯಂ'  
ಪಂಡ್‍ದ್ ತುಳುನಾಡ್‍ಡ್ ಪುಟ್ಟುದು ಕೇರಳೊಡು ಬುಳೆದಿನ ತುಳುವೀರ ದೈವ ಪನ್ಪಿಲೆಕ್ಕ, ತುಳುನು ಒರಿಪಾವುನ ಬೇಲೆನ್ ಊರು ಪರವೂರುಡುಪ್ಪುನ ಮಾತಾ ತುಳುವೆರ್‍ಲಾ ಮನಸ್ ದೀದ್ ಮಲ್ಪೊಡು. ನಮ ಅಪ್ಪೆ ಬಾಸೆ ತುಳು ಆಂಡಲಾ ಇಲ್ಲಡ್ ಕನ್ನಡ ಪಾತೆರುನಕುಲು ತುಳುನಾಡ್‍ಡೇ ಮಸ್ತ್ ಜನೊಕ್ಲು ಉಲ್ಲೆರ್. ಅಂಚಿತ್ತಿನಕುಲು ನನ ದುಂಬುಗಾಂಡಲಾ ಇಲ್ಲಡ್ ತುಳುಟ್ಟೇ ಪಾತೆರುವೇ ಪನ್ದ್ ನಿಶ್ಚಯ ಮಾಲ್ಪೊಡು. ಊರುದ ಮಣ್ಣ್ ‍ದ ಋಣ ತುಂಡಾದ್ ಪೋತಿಪ್ಪೆರಲಾ ಯಾವು, ಆಂಡ ನಮ್ಮ ಹಿರಿಯಾಕ್ಲು ಮುಲ್ಪದ ಗಾಳಿ, ನೀರ್, ಮಣ್ಣ್, ನುಪ್ಪು, ತಿನಸ್‍ಲೇನ್ ತಿಂದ್‍‍ದ್ ಬಳತ್ತಿನ ನೆಂಪು ಉಪ್ಪೊಡು. ನಮ ತುಳು ತುದೆತ ಮೀನಾದ್ ತುಳು ಕಡಲ್ ಮೀಂದೊಡು, ತುಳುವಪ್ಪೆನ ತಿಗಲೆದ ಬೆಪ್ಪು ಬೇನೆನ್ ತೆರಿದ್ ಸೇವೆ ಮಲ್ಪುಗಾ ಪಂಡ್ತ್ ಪಂಡೊಂದು, ಮಾತೆರೆಗ್ಲಾ ಸೊಲ್ಮೆಲೆನ್ ಸಂದಾವೊಂದು, ಎನನ್ ಈಡೆ ಮುಟ್ಟ ಲೆತ್ತುದ್ ಈ ರಡ್ಡ್ ಪಾತೆರೊ ಪಾತೆರಿಯೆರೆ ಅವಕಾಶೊ ಕೊರ್ನ ಈ ತುಲಿಪುನು ಏರ್ಪಾಡ್ ಮಲ್ತಿನ ತುಳು ಅಕಾಡೆಮಿತ ಮಾತೆರೆಗ್ಲಾ ಕೈ ಮುಗಿತ್ ಎನ್ನ ಪಾತೆರೊನು ಉಂತಾವೆ.

ಜೈ ಹಿಂದ್

ಜೈ ತುಳುವಪ್ಪೆ

Narayan Delampady

delampadynarayan@gmail.com

ಆಕರಗಳು:

ತುಳು ಸಾಹಿತ್ಯ ಚರಿತ್ರೆ, ಪ್ರಧಾನ ಸಂ. ಡಾ. ಬಿ. ಎ. ವಿವೇಕ ರೈ ಮತ್ತು ಇತರರು.

ಪ್ರಕಾಶನ: ಪ್ರಸಾರಾಂಗ ಕನ್ನಡ ವಿಶ್ವವಿದ್ಯಾಲಯ ಹಂಪಿ

ಮಹಾಜನಪದ, ಡಾ. ವೆಂಕಟರಾಜ ಪುಣಿಂಚತ್ತಾಯರ ಸಮಗ್ರ ಲೇಖನ ಸಂಪುಟ, ಸಂ. ಡಾ ಪಾದೇಕಲ್ಲು ವಿಷ್ಣು ಭಟ್ಟ

ವಿವಿಧ ಜನಪದ ಸಾಹಿತ್ಯಗಳು ಮತ್ತು ಇತರ ಮೂಲಗಳು